Бороҕон нэһилиэгэр бэс ыйын 5 күнүгэр, Сомоҕолоһуу уонна бииргэ үлэлэһии сылын чэрчитинэн "-Түмсүүнэн -сайдыыга, үлэнэн үрдэлгэ " улахан тэрээһин ыытылынна.Тэрээһиҥҥэ кыттыыны ыллылар, улууспут аҕа баһылыга Василий Алексеев, улуус депутаттарын сэбиэтин бэрэссэдээтэлэ Иннокентий Иннокентьевич Аммосов, нэһилиэктэр аҕа баһылыктарын кытта үлэҕэ, отдел начальнига Сергей Петрович Шепелев, улуус нэһилиэктэрин баһылыктара, ыалдьыттара.
Нэһилиэкпитигэр киирии аартыкка, нэһилиэкпит аҕа баһылыгын эбээһинэһин толорооччы Константин Копырин, оскуола үөрэнээччилэрэ: Вика Поротова, Вика Габышева, Айтал Терентьев, Арылхан Егоров ыалдьыттары уруйдуу-айхаллыы көрүстүлэр.
“Түмсүү” норуот айымньытын киинигэр ыраахтан кэлбит нэһилиэктэр баһылыктарын, ыалдьыттары “Аал уот” аҕам саастаахтар, “Көмүлүөк” үһүс саас оскуола түмсүүлэрин чилиэттэрэ үрүҥ сылгы сиэлинэн, боҕуруоскай отунан сыт таһааран, сахалыы сиэринэн арчылаатылар, арыылаах алаадьынан, быыппаҕынан, саламаатынан күндүлээтилэр.
“А.Р.Халдеева” аатынан нэһилиэк библиотекэтэ “Култуура-духуобунас сайдыыта” кинигэ быыстапкатын туруоран сырдатта. “Көмүлүөк” үһүс саас оскуола чилиэннэрэ ,улуус норуотун маастардара:Сардаана Иннокентьевна Стрекаловская, Анастасия Гаврильевна Габышева талба талааннаахтарбыт: Татьяна Егоровна Габышева, Ирина Иннокентьевна Черкашина, Варвара Пакловьевна Петрова, Валентина Ивановна Новоприезжая, Светлана Александровна Прудецкая, Хойоҥдо Ил Ииһэ –Саһылыкаан кыыһа, Лидия Степановна Барашкова уус-уран оҥоһуктарын быыстапкатын туруоран сырдаттылар.
Нэһилиэк баһылыктарын выездной планерката 10 чаастан олохтоох дьаһалта хонтуоратыгар ыытылынна.Үгүс боппуруостары, туруорсуулары ырытыстылар, инники былааннарын торумнастылар, уопут атастастылар. Нэһилиэк баһылыктара, ыалдьыттара, нэһилиэкпит дириҥ историятын - кытта билистилэр, кэрэ-бэлиэ миэстэлэринэн сылдьан санаа-атастастылар.Ол курдук сынньалаҥ пааркатыгар, Кыайыы болуоссатыгар, Сүдү киһибитигэр Сэһэн Ардьакыап пааматынньыгар сүгүрүйдүлэр.
Күн иккис аҥарыгар саҥа тутуллубут И.А.Халдеев аатынан спортивнай комплекска, баһылыктар спартакиадалара үөрүүлээхтмк аһылынна . Тэрээһин аһыллыытын “Күндээр” оҕо үҥкүү ансамбла үҥкүүнэн киэргэттэ,, салайааччы Елена Иванова.
Баһылыктар сэрэбиэйинэн сэттэлии буолан, 3 хамаандаҕа арахсан, 5 көрүҥҥэ (дартс, баскетбол мээчигин щитка быраҕыы, волейбол, канат) күрэхтэригэр илин-кэлин түһүстүлэр. “Боотур”, “Дохсун”, “Дьулуур” хамаандалар бэрт тыҥааһыннаахтык кииристилэр.Күрэх кылаабынай судьуйата Афанасий Габышев, көмөлөһөөччү судьуйа Семен Федоров. Күрэҕи тэрийэн ыыттылар “Түмсүү” норуот айымньытын киинин специалистара. Уопсай түмүккэ “Дохсун” -8 очкону ылан бастакы миэстэни, “Боотурдар” -9 очкону ылан иккис миэстэ, “Дьулуур” -13 очкону ылан үһүс бочуоттаах миэстэни ылары ситистилэр.Бары миэстэлэспит хамаандалар чилиэттэригэр, улуус баһылыга Василий Алексеев нэһилиэктэригэр харчынан бириистэри үөрүүлээх чааска туттарда.Ол курдук бастакы миэстэни ылбыт хамаанда баһылыктарыгар 150тыһ сууммалаах сертификат, иккис миэстэни ылбыт хамаанда баһылыктарыгар 100 тыһ сууммалаахсертификат, үһүс миэстэни ылбыт хамаанда баһылыктарыгар 50 тыһ.сууммалаах сертификаттар туттарылыннылар. Улуус нэһилиэктэрин баһылыктара тэрээһинтэн астыммыттарын биллэрэн, махтал тылларын эттилэр уонна нэһилиэкпит спортивнай комплексыгар инвентарь ыларга харчынан көмө туттардылар.
Күрэх кэнниттэн нэһилиэк баһылыктара, ыалдьыттара нэһилиэк олохтоохторугар ылбаҕай ырыаларын дьоро киэһэҕэ бэлэхтээтилэр.Кэнсиэри салайан ыытта, Бэрт ууһун нэһилиэгин баһылыга Илья Прокопьевич Ильин.Улууспут аҕа баһылыга Алексеев Василий Петрович нэһилиэктэр баһылыктарын, олохтоохторго билиһиннэрдэ, нэһилиэктэригэр туох үлэлэр барбыттарын, инники былааннарын билиһиннэрдэ. Хас биирдии нэһилиэк туох кыһалҕалааҕын, туруорсууларыгар өйөбүл буоларын биһирээтибит.Олохтоохтор баһылыктар дэгиттэр талааннарын сөҕө махтайа көрдүлэр, хабыллар ытыс тыаһын бэлэх ууннулар.Бу тэрээһинтэн ыалдьыттар, олохтоохтор астынан тарҕастылар.Бука бары биир санаанан салайтаран,түмсүүлээхтик үлэлээтэхпитинэ улууспут чэчирии сайдыаҕа, бары күүспүт сомоҕолоһууга.Бу улахан тэрээһиҥҥэ күүс-көмө буоллулар нэһилиэк тэрилтэлэрэ, аҕам саастаахтар общественнай түмсүүлэрэ.
