2024сыл түмүгүнэн А.Р.Халдеева аатынан модельнай сельскай библиотека аатыттан, бастыҥ  ааҕааччыларга сертификаттар, бэлэхтэр туттарылыннылар. Ол курдук алын сүһүөх кылаастарга “ Бастыҥ ааҕар кылаас” анал ааты Тумул орто оскуолатын 3 кылааһын үөрэнээччилэрэ, кылаас салайааччыта Варвара Пакловьевна Петрова, “Саамай көхтөөх кылаас ” анал ааты Тумул орто оскуолатын 8 кылааһын үөрэнээччилэрэ, кылаас салайааччыта Анастасия Михайловна Поротова, “Ситиһиилээх бастыҥ кылаас” Тумул орто оскуолатын 11 кылааһын үөрэнээччилэрэ, кылаас салайааччыта Николай Юрьевич Васильев. “ Сыл бастыҥ ааҕааччыта ”- Лексякуна Амелия Тумул орто оскуолатын 3 кылааһын үөрэнээччитэ. Библиотека көхтөөх ааҕааччылара Амелия, Виталий Петровтар.

   Үүнэр 2025 сылы көрсө, инвалидтар декадаларын чэрчитинэн, нэһилиэкпит олохтооҕо, айылҕаттан талааннаах Тютрина Евдокия Степановна уус-уран оҥоһуктарын быыстапката, А.Р. Халдеева аатынан нэһилиэк библиотекатыгар турда, ааҕааччылар араас матырыйаалтан оҥоһуллубут оҥоһуктары сэргээн көрдүлэр. Оҕо сааһыттан доруобуйатынан хааччахтаах  Евдокия Тютрина иллэҥ бириэмэтин туһалаахтык атаарар, уруһуйдуур, кумааҕыттан  оҥоһуктары кырыйар, араас матырыйаалтан оҥоһуктары оҥорор, нэһилиэк библиотекатыгар быыстапкаҕа иккис төгүлүн ситиһиилээхтик кыттар, киниэхэ  “ Көмүс тарбахтаах маастар” анал сертификата туттарылынна.

        Улууспутугар ааҕар балаҕантан саҕалаан бастакы норуодунай библиотека төрүттэммитэ 100 сыллаах юбилейынан, Бороҕон нэһилиэгин сельскай библиотекатыгар 50-чэ сыл таһаарыылаахтык үлэлээбит СР култууратын туйгуна, Уус Алдан улууһун норуотун маастара, Уус Алдан улууһун уонна Бороҕон нэһилиэгин бочуоттаах олохтооҕо Анна Романовна Халдеева аатын үйэтитэн чугас аймахтара Халдеевтар, Алексеевтар, Дьячковскайдар убаастыыр эдьиийдэрин сырдык аатын үйэтитэн, А.Р.Халдеева аатынан сельскай модельнай библиотекаҕа 30000сууммалаах харчынан   бэлэх оҥордулар. Халдеевтар аймах нэһилиэк библиотекатыгар өрүү спонсордыыллар, күүс-көмө буолалларыгар махталбыт муҥура суох. Эһиэхэ Үүнэр 2025 сыл үгүс элбэх ситиһиилэри аҕаллын, үтүө санааҕыт үрдүккэ кыттаатын, бар-дьон махталын, ытыктабылын ыла турун.