Бороҕон нэһилиэгэр “Түмсүү” норуот айымньытын киинигэр , Бороҕон нэһилиэгин “Аал уот” аҕам саастаахтара, “Көмүлүөк” үһүс саас оскуола чилиэттэрэ, ыаллыы сытар Баатаҕай, II Хомустаах нэһилиэктэрин аҕам саастаахтара үүммүт 2026 сылы көрсө үөрүүлээх тэрээһиҥҥэ муһуннулар. Ыалдьыттары сахалыы сиэринэн, аҕам саастаахтар арыылаах алаадьынан, кыынньар кымыһынан айах тутан көрүстүбүт. «Арчы” дьиэтигэр алгысчыт Акулина Сокольникова, арыалдьыттар Петр Черкашин, Светлана Иванова алгыс сиэрин-туомун ыыттылар.Тэрээһин торжественнай чааһыгар баһылык эбээһинэһин толорооччу Константин Михайлович Копырин аҕам саастаахтары эҕэрдэлээн туран, нэһилиэктэр түмсүүлэрин салайааччыларыгар: Надежда Сивцеваҕа –II Хомустах, Августина Пермяковаҕа -Баатаҕай, Петр Черкашинца эҕэрдэлэри өйдөбүнньүктэри туттарда, «Аал уот” аҕам саастаахтарын салайааччыта Петр Черкашин юбилейдаахтары Ирина Черкашинаны, Розалия Васильеваны наҕараадалаата . Аҕам саастаахтар сандалы остуол тула олорон ирэ-хоро билистилэр - кэпсэттилэр. Альберт Васильев баяҥҥа доҕуһуолунан эҕэрдэ ырыалар ылланнылар, үҥкүүлэр ыытылыннылар.
Култуура сылын чэрчитинэн, А.Р.Халдеева аатынан олохтоох библиотека салайааччыта Светлана Прудецкая «Толкуйдаа-оонньоо-кыай”- интерактивнай оонньууну ыытан, хамаандалар көхтөөхтүк кыттан илин-кэлин түһүстүлэр.Түмүккэ I миэстэни Бороҕон, II миэстэни Баатаҕай, III миэстэни II Хомустаах аҕам саастаахтарын хамаандалара ылан сертификатынан, бэлэхтэринэн наҕараадаланнылар.Кэлбит ыалдьыттар библиотекаҕа уус-уран быыстапканы көрдүлэр, талба талааннаах Евдокия Тютрина, Любовь Петухова сертификатынан, бэлэҕинэн бэлиэтэннилэр.
Бал маскарад күрэҕэр бастакы миэстэни Баатаҕайтан «Дьөһөгөй” маскарад, иккис миэстэни Хомустахтан “Дьөһөгөй” маскарад, үһүс миэстэни Бороҕон нэһилиэгиттэн ааспыт сыл бэлиэтэ “Моҕой” уонна “Лабубу” ылан сыаналаах бэлэхтэринэн наҕараадаланнылар, маскарадтарга барыларыгар бэлэхтэр туттарылыннылар.Саҥа үүммүт сылынан Тымныы Моруос оҕонньор (Петр Черкашин) уонна Хаарчаана (Ил Ииһэ Хойоҥдо) харыйа тула маскарадтары үҥкүүлэтэн үүрүүлэрин үрдэттилэр. Тэрээһини иилээн-саҕалаан ыыттылар Элэһин кулуубун салайааччыта Ион Соловьев, Арыы-Тиит учаастагыттан, нэһилиэк депутата Лена Заровняева.Тэрээһинтэн аҕам саастаахтар дуоһуйан, астынан тарҕастылар.
