Бороҕон нэһилиэгэр тохсунньу 27 күнүгэр Тумул орто оскуолатын бэйэни салайыныыга үлэтин уопутун сырдатар "Оҕоҕо итэҕэл-кинини арыйар күлүүс" ахтыы кинигэ презентациятын үөрүүлээх тэрээһинэ ыытылынна. Ол курдук Тумул орто оскуолатыгар 1974-1989сс французскай тыл учууталынан, иитэр үлэҕэ директоры солбуйааччынан үлэлээн, бэйэни салайыныыга киэҥ хабааннаах үлэни сүрүннээбит педагогическай үлэ ветерана, РСФСР үөрэҕириитин туйгуна, СР ыччат политикатыгар туйгуна, Уус Алдан улууһун социальнай-экономическай сайдыытыгар кылаатын иһин", " Уус Алдан улууһун үөрэҕириитин сайдыытыгар кылаатын иһин" бэлиэлэр  кавалердара, Боро5он нэһилиэгин бочуоттаах олохтооҕо Елена Петровна Аммосова сыралаах үлэтин сыаналаан, таһаарыылаах үлэтин сырдатан махталлаах үөрэнээччилэрэ, убаастыыр учууталбыт үбүлүөйдээх сааһынан уонна Учуутал уонна настаабынньык сылынан Новосибирскай куоракка 200 экземплярынан бэчээттэтэн таһааран сүрэхтэниитин ыыттыбыт. Кинигэ тахсыытыгар араас сылларга  үөрэппит үөрэнээччилэрэ күүс-көме буоллубут, сүрүн спонсор -үөрэнээччитэ Петр Алексеев. Тэрээһиҥҥэ Тумул орто оскуолатын ветеран учууталларын, педколлективын уонна нэһилиэк библиотекатын, музейын фондаларыттан быыстапкаҕа материаллар турдулар. Үөрүүлээх тэрээһиҥҥэ коллегалара, ветеран учууталлар, выпускниктар кыттыыны ыллылар .Музыкальнай эҕэрдэлэр, анабыл хоһооннор ааҕылыннылар. Бу үөрүүлээх чааска Бороҕон нэһилиэгин дьаһалтатын баһылыга Василий Алексеев ,ветеран учууталга Елена Петровнаҕа- "СӨ үөрэҕин систематын   бочуоттаах үлэһитэ" анал бэлиэни туттарда. Үөрэппит оҕолоро "Романтика" агитбригадалар, оҕо саастарын санаан монтаж ааҕан, ырыа ыллаан, Тумул орто оскуолатын үөрэнээччилэрэ бөлөҕүнэн  үҥкүүлэри туруоран сценаны киэргэттилэр. 70-80 ссылларга үөрэппит оҕолорун хаартыскаларынан медиапрезентация көрдөрүлүннэ. Учууталбыт Елена Петровна муспут фотоларынан альбом оҥорон,  А.Р.Халдеева аатынан модельнай сельскай библиотекаҕа  бэлэх туттарда.