Улууска ыытыллыбыт “Өрөгөй кынаттаах Кыайыы ыһыаҕа” Россияҕа Аҕа дойдуну көмүскээччилэр,Саха сиригэр Ийэ дойдуну көмүскээччилэр,Уус Алдан улууһугар тыа хаһаайыстыбатын сылларынан, Уус Алдан улууһа төрүттэммитэ 95 сылынан, Мүрү нэһилиэгэ  төрүттэммитэ 65 сылынан, Улуу Кыайыы 80 сылынан “Саха төрүт таҥаһа-Өбүгэ өйдөбүнньүгэ” дьиэ кэргэнинэн сахалыы таҥас күрэҕэр кыттан “Кылаан чыпчаал” кыайыылааҕа үрдүк аатын ыллылар Бороҕон нэһилиэгиттэн Анастасия, Владимир Габышевтар дьиэ кэргэттэрэ.

    Уран тарбахтаах иистэнньэҥ,  “Көмулүөк” үһүс саас оскуола көхтөөх чилиэнэ Анастасия Гаврильевна Габышева-“Өбүгэ таҥаһын сөргүтэн”- дьиэ кэргэнигэр тикпит мындыр, ураты  үлэлэрэ дьон сэргэ кэрэхсэбилин , дьүүллүүр сүбэ үрдүктүк сыанабылын ылыан ылла. Буолаары турар Нерюнгри куоракка  Олоҥхо ыһыаҕар  “Өбүгэ ииһин сөргүтэн”  уус-уран быыстапкаҕа  нэһилиэгин, улууһун аатыттан кыттыаҕа.

   Нам улууһугар  "Уйгу-быйаҥ ыһыахха"  улуустааҕы ыһыахха педагогическай үлэ ветерана, "Көмүлүөк" үһүс саас оскуолатын көхтөөх чилиэнэ Новоприезжая Матрена Афанасьевна, ветераннарга ырыа күрэҕэр кыттан II Бочуоттаах миэстэни ылары ситистэ. Кыайыылаахтарбытын Матрена Афанасьевнаны, Анастасия Гаврильевнаны "Көмүлүөк" үһүс саас оскуола аатыттан истиҥник эҕэрдэлиибит, өссө да үрдүк чыпчааллары баҕарабыт.