Информация о материале

Автор: Super User

   Уус Алдан улууһугар Бороҕон нэһилиэгэр умнуллубат бэлиэ тэрээһин үрдүк тэрээһиннээхтик  буолан ааста.

Ол курдук, саха норуотун инники сайдыытыгар сүҥкэн кылааты киллэрбит биир дойдулаахпытыгар, бөдөҥ уопсастыбаннай, бэлитиичэскэй диэйэтэл Алексей Аржаков-Сэһэн Ардьакыап сүдү аатыгар сүгүрүйэн, ытык сиргэ «Собоһут аартыгар», өбүгэбит сиэринэн алгыс ыытылынна. Ытык өбүгэлэртэн, үрдүк айыылартан көрдөһүү сиэрин-туомун кыраайы үөрэтээччи, настаабынньык учуутал  Акулина Степановна Сокольникова ыытта. Арчылааһыҥҥа нэһилиэк «Аал уот», Көмүлүөк» аҕам саастаахтарын түмсүүлэрэ кытыннылар. Бу күн тэрээһиҥҥэ түмсүбүт ыалдьыттары сылаас саламаатынан, арыылаах алаадьынан, уохтаах кымыһынан күндүлээтилэр.

Олохтоох дьаһалта дьиэтин иннигэр ыраахтан кэлбит ыалдьыттар, нэһилиэк олохтоохторо Сэһэн Ардьакыап пааматынньыгын үөрүүлээх аһыллыытыгар муһуннулар. Алгыс сиэрин-туомун өрөспүүбүлүкэҕэ биллэр-көстөр алгысчыт Иван Герасимович Васильев-Алгыс Уйбаан ыытта. Кэтэһиилээх, долгутуулаах тэрээһиҥҥэ мустубут дьон ытыстарын тыаһыгар доҕуһуоллатан пааматынньык аалай кыһыл лиэнтэтэ быһылынна. «Түмсүү» КК Сэһэн Ардьакыапка аналлаах «Бөдөҥ уопсастыбаннай диэйэтэл Сэһэн Ардьакыап үйэлэри өтө көрөн» кинигэ быыстапката, национальнай архыып пуондаларыттан докумуоннар, хаартыскалар быыстапкаҕа туруорулуннулар. Тэрээһин үөрүүлээх чааһа култуура дьиэтигэр олоҥхонон аһылынна. Олоҥхону Тумул орто оскуолатын 2 кылааһын үөрэнээччилэрэ толордулар. Сэһэн Ардьакыап «Сахалар тустарынан былаана» испэктээктэн сынньалаҥ киинин иһинэн үлэлиир «Айыллан» норуот тыйаатыра быһа тардан көрдөрдө. Тэрээһиҥҥэ эҕэрдэ эгэлгэтэ этилиннэ, ырыа-тойук тардылынна.

Бырайыак ааптарыгар, Уус Алдан улууһун уонна Бороҕон нэһилиэгин бочуоттаах олохтооҕор Пётр Спиридонович Алексеевка ыалдьыттар, нэһилиэк олохтоохторо барҕа махталларын тиэртилэр. Пётр Спиридонович үүнэр-көлүөнэ ыччаты патриотическай тыыҥҥа иитиигэ сүдү үлэтэ үрдүктук сыаналанан, анал бочуоттаах бэлиэ үөрүүлээх быһыыга туттарылынна. Нэһилиэк тэрилтэлэрин салайааччылара уйгу-быйаҥ чороонун бэлэх ууннулар. Бу история кэрэһитэ, пааматынньык үүнэр көлүөнэ ыччакка дириҥ суолталаах, өйдөбүллээх холобур буолара саарбахтаммат.

Информация о материале

Автор: Super User

 Олоҥхо дьиэтигэр улуус нэһилиэктэрин “Үһүс саас оскуола” филиаллара  үөрэх дьылын түмүктүүр тэрээһинэ "Тиһэх чуораана лыҥкынаата". Улуустааҕы тэрээһини үһүс саас оскуола салайааччыта Готовцева Матрена Гаврильевна салайда. Тэрээһин үөрүүлээх аьыллыытыгар, нэһилиэк филиаллара торжественнай линейкаҕа парадтаан киирдилэр.Үһүс саас оскуола тэрээһинигэр кыттыыны ыллылар: Улуус дьаһалтатын анал байыаннай дьайыы эппиэттээх үлэһитэ Иннокентий Иннокентьевич Троев, Мүрү нэһилиэгин баһылыга Прокопий Федотович Румянцев, улуустааҕы ветераннар сэбиэттэрин председателя Олег Федорович Федоров, Уус-Алданнааҕы нэһилиэнньэ социальнай  көмүскэлин киинин салайааччыта Елена Егоровна Кривошапкина аҕам саастаахтарга эҕэрдэлэри, наҕараадалары туттардылар. Тэрээһиҥҥэ С.С. Васильев-Борогонскай аатынан улуустааҕы кииннэммит библиотека, библиотекардара: Сардаана Михайловна Черкашина, Татьяна Дмитриевна Бурцева Кыайыы 80 сылынан “Квиз-оонньуу” ыыппыттарын сэргээтибит. “Мүрү саһарҕата” хаһыат редакциятыттан, корреспондент Светлана Сивцева ыалдьыттаата. Филиаллартан Мүрү ,Суотту, Бороҕон, Найахы ,Өлтөх нэһилиэктэрэ  сахалыы таҥнан кэлбиттэрэ биһирэннэ. Үгүс күрэхтэр, оонньуулар ыытылыннылар. Бороҕон нэһилиэгиттэн педагогическай үлэ бэтэрээннэрэ, сэрии оҕото Зоя Ивановна Протопопова, Мария Романовна Халдеева хоһооҥҥо, ырыаҕа, оонньууларга кыттан көхтөөхтөрүн көрдөрдүлэр. Үһүс саас оскуола чилиэннэрэ араас күрэхтэри   ыытыһан, кыттан сертификаттары, бириистэри тутан ,үөрэн-көтөн сэргэхсийэн тарҕастылар.

Информация о материале

Автор: Super User

Бэс ыйын 6 күнүгэр «Мигалкин самаан сайына” литература фестиваля Улуу Кыайыы 80 уонна Саха суругун литературата төрүттэммитэ 125 сылларыгар ананан, Чараҥ бөһүөлэгин  ытык бэлиэ сиригэр ,  кэрэ айылҕалаах “Нэлээн” алааһыгар үрдүк таһымҥа, сүрдээх  тэрээһиннээхтик буолан ааста. Бу улахан литературнай фестивалы СР Суруйааччыларын ассоциацията, култуура улуустааҕы управленията, Уус Алдан улууһун кииннэммит модельнай библиотеката, Сэһэн Ардьакыап аатынан кыраайы үөрэтэр түмэл, “Мүрү саһарҕата” хаһыат редакцията, Мүрү, I Хоро уонна II Лөгөй нэһилиэктэрин дьаһалталара , “Уһуктуу” литературнай түмсүү көҕүлээн, тэрийэн ыыттылар.Ыраахтан кэлбит ыалдьыттары, кыттааччылары, айар куттаахтары, литературнай түмэл, кииннэммит библиотека үлэһиттэрэ олус истиҥник, сахалыы сиэринэн  арыылаах алаадьынан уруйдуу көрүстүлэр. Кыттааччылар сахалыы сайбаччы таҥнан Дьокуускайтан, Горнайтан, Намтан, Эдьигээнтэн кэлбиттэрэ кэрэхсэбиллээх.Фестиваль Саха литературатын сайыннарыыга, бөҕөргөтүүгэ, биир дойдулаахпыт СР норуодунай суруйааччыта Иван Васильевич Мигалкин айар үлэтин сырдатыыга, үйэтитиигэ ааҕааччы киэҥ араҥатыгар туһуланан ыытылынна. Тэрээһиҥҥэ айар куттаахтар өйтөн хоһоон күрэҕэр кытыннылар, эдэр кэскиллээх ааптардар   «Мин суруйааччыбын” поэзияҕа холоннулар. “Айар” кинигэ кыһатын атыыта, Иван Мигалкин олоҕун, айымньыларын көрдөрөр кинигэ быыстапката дьон-сэргэ, ыалдьыттар болҕомтолорун тарта.Тэрээһин кэмигэр “Дани –Алмас” типография кэлбит ыалдьыттарга, күрэх кыттыылаахтарыгар , кинигэ таһаартарыытыгар 10% чэпчэтиилээх купоннары бэлэхтээтилэр.Маны сэргэ улууспут олохтоох автордарын, суруйааччыларын автографтаах кинигэлэрин ааҕааччылар,  хамаҕатык атыыластылар. Күрэх түмүгүнэн СР суруйааччыларын Сойууһун чилиэнэ, элбэх кинигэ ааптара, “Чурапчы”  литературнай түмсүү салайааччыта ,СР култууратын туйгуна Римма Иннокентьевна Корякина-Хотууна “Мин суруйааччыбын” уус -уран айымньы  кылаан кыайыылааҕынан, “Дорҕоонноох Далбар Хотун” анал ааты ылары ситистэ.Тэрээһиҥҥэ Иван Мигалкин хоһоонноро ырыа буолан ылланнылар, хомус алгыстаах тыаһа дьиэрэйдэ.

    Бороҕон нэһилиэгиттэн тэрээһиҥҥэ кыттыыны ылла,  “В.М.Прокопьев”- аатынан Тумул орто оскуолатын, алын сүһүөх кылаас  учуутала Раиса Егоровна Софронова. Кини  оҕо  суруйааччыта  Иван Мигалкин уус-уран айымньыларынан оҕо айар дьоҕурун сайыннарыыга, үөрэнээччилэрин бэлэмнээн ааҕыыларга, тэрээһиннэргэ, курэхтэргэ кытыннарбыт ситиһиилэрин түмэн брошюра оҥорбутун  сырдатта. Улуус култуурата, кииннэммит библиотека, “Уһуктуу” айар куттаахтар түмсүүлэрэ Раиса Егоровнаҕа норуодунай суруйааччы Иван Мигалкин  аатын үйэтитиигэ үгүс үлэни ыытарыгар махтанан туран,  махтал суругу, өйдөбүнньүгү  туттарда.

Литературнай фестивальга кэлбит ыалдьыттар, кыттааччылар истиҥ сылаас көрсүһүүттэн, астынан, анал бириистэргэ тиксэн, өйдөбүнньүк хаартыскаҕа түһэн,  саха төрүт  оһуохайын үҥкүүлээн, тэрийээччилэргэ махталлара үлахан.

.

Информация о материале

Автор: Super User

     «Тумулчаана» уһуйаан  иитээччилэрэ, методиһа Лидия Степановна  «А.Р. Халдеева” аатынан олохтоох модельнай библиотеканы кытта ситимнээхтик үлэлэһэллэр.Оҕо көмүскэлин күнүн көрсө уһуйаанҥа библиотечнай тэрээһин ыытылынна.Тэрээһин биир дойдулаахпыт, саха народнай поэта Иван Васильевич Мигалкин оҕолорго аналлаах айымньыларыгар ананна. Олохтоох библиотекаҕа “Оҕо мичээрэ, оҕо үөрүүтэ” –оҕо суруйааччыта, суруналыыс, тылбаасчыт И.В. Мигалкин- Кэрэл айымньыларынан кинигэлэр, алын сүһүөх кылаас учуутала Софронова Р.Е. кылааһын үөрэнээччилэрин , ааптар Иван Мигалкин  “Отон этим, оҕо этим” айымньыларынан ааҕыыларга, араас күрэхтэргэ  кыттыбыт ситиһиилэрин, уруһуйдарын  киллэрэн оҥорбут планшета быыстапкаҕа туруорулунна. Уһуйаан иитиллээччилэрэ Иван Мигалкин “Куоска уонна кутуйах” остуоруйатын,  хоһооннорун сэргээн иһиттилэр, остуоруйаны ырыттылар, санааларын үллэһиннилэр.Ааптар кинигэлэрин олус сөбүлээн көрдүлэр.

    Оҕо көмүскэлин күнүн  көрсө, библиотека көхтөөх ааҕааччыта, ветеран учуутал Новоприезжая Матрена Афанасьевна музыка уруогар үөрэппит убаастыыр учууталын Иван Афанасьевич Бубякин-Чөҥөчөк  оҕолорго аналлаах кинигэлэрин олохтоох библиотекаҕа бэлэхтээтэ. Уһуйаан иитиллээччилэрэ саҥа  кинигэлэри кытта билистилэр,  иитээччилэр бу кинигэлэри үгүс тэрээһиннэргэ, занятиеларга  туттуохтара. 

       «Тумулчаана” уһуйаан бары үлэһиттэрин , иитиллээччилэрин  оҕо көмүскэлин күнүнэн истиҥник эҕэрдэлиибит, бэлэх кинигэ спонсорыгар элбэх сиэн эбээтигэр, бэтэрээн  учууталга Матрена Афанасьевнаҕа библиотека  ааҕааччыларын ааттарыттан махтанабыт.